Sino ang Pinoprotektahan ng Karapatan, at Bakit Tutol Sila sa Anti-Terror Law?

Ngayong araw, Hulyo 3, 2026, inaasahang magsasagawa ng kilos-protesta

ang Karapatan at iba pang mga kaalyadong organisasyon sa harap ng Department of Justice sa Padre Faura, Maynila. Layunin nilang tutulan ang pagpapatupad ng mga batas laban sa terorismo, partikular ang Anti-Terrorism Act of 2020 (ATA) at ang Terrorism Financing Prevention and Suppression Act of 2012, na tinatawag nilang "twin terror laws."

Ayon sa Karapatan, ginagamit umano ng estado ang mga batas na ito upang gipitin at supilin ang mga indibidwal at organisasyong kritikal sa pamahalaan.

Ngunit taliwas dito ang pananaw ng Buklod Kapayapaan, isang samahan ng mga dating kasapi ng Communist Party of the Philippines (CPP) at New People's Army (NPA) na nagbalik-loob sa pamahalaan. Para sa kanila, hindi dapat pahinain ang pagpapatupad ng mga batas na ito. Sa halip, kailangan pa itong palakasin upang masugpo ang terorismo at maputol ang mga network na sumusuporta rito.

Ayon sa mga dating rebelde, hindi ang mapayapang pagpapahayag ng saloobin ang target ng ATA at ng Terrorism Financing Prevention and Suppression Act. Ang layunin ng mga ito ay papanagutin ang mga indibidwal at grupong sangkot sa mga gawaing terorista, kabilang ang mga nagbibigay ng pondong ginagamit sa pagpapatuloy ng armadong pakikibaka.

Hindi rin basta-basta isinasampa ang mga kasong may kaugnayan sa terorismo. Dumaraan ang mga ito sa masusing imbestigasyon, pangangalap ng ebidensya, at pagbuo ng kaso bago ihain sa hukuman. Sa huli, ang korte pa rin ang nagpapasya batay sa mga ebidensyang iniharap ng magkabilang panig.

Kung gayon, tanong ng mga dating rebelde kung bakit mariing tinututulan ng Karapatan ang mga batas na ito. Kung ang mga ito ay para lamang sa mga sangkot sa terorismo at sa pagpopondo nito, bakit tila sila ang pangunahing nangangampanya laban sa mga ito?

Isa sa mga kasong binanggit ng Karapatan ay ang kina Frenchie May Cumpio at Marielle Domequil, na nahatulan sa kasong may kaugnayan sa terror financing. Ayon sa Karapatan, ginamit umano ang batas upang patahimikin ang kanilang pamamahayag at aktibismo.

Subalit iba ang pananaw ng mga dating rebelde. Ayon sa kanila, nakasama nila mismo sa loob ng mga yunit ng NPA at sa mga organisasyong pinamumunuan ng CPP ang ilan sa mga taong ipinagtatanggol ngayon ng Karapatan. Iginiit nilang ang kanilang mga testimonya, kasama ng iba pang ebidensyang iniharap sa hukuman, ang naging batayan ng naging hatol ng korte.

Sino nga ba talaga ang pinoprotektahan ng Karapatan? Ang mas nakararaming mamamayang nais maging ligtas laban sa terorismo, o ang mga indibidwal na nahaharap sa kasong may kaugnayan sa mga grupong iniuugnay sa armadong kilusan?

Ang pagtutol sa isang batas ay karapatan ng bawat mamamayan. Ngunit nararapat ding itanong kung ang panawagang pahinain ang mga batas laban sa terorismo ay makatutulong ba sa seguridad ng publiko, o kung higit nitong pinahihirapan ang pananagutan ng mga tunay na sangkot sa terorismo at sa pagpopondo nito.