Tahol at Meow sa Balay Panaghiusa: animal health caravan, inilunsad

ASUNCION, DAVAO DEL NORTE — Muling nagkaroon ng masayang ingay sa isang former rebels halfway house dito, pero hindi mula sa pulong o seminar, kundi sa mga tahol at meow ng mga alagang hayop na mga former rebel (FR) at mga residente ng komunidad na pumila para sa libreng bakuna laban sa rabies.

Sa pakikipagtulungan ng Kalinaw Davao del Norte, and panlalawigang pederasyon ng mga dating kasapi ng CPP-NPA-NDF na nagbalik-loob, at ng Provincial Veterinary Office (PVO) ng Davao del Norte, inilunsad ang “Bantay Hayop, Bantay Katawhan: Community Animal Health and Welfare Caravan” noong Agosto 12 sa Balay Panaghiusa sa Barangay Doña Andrea, Asuncion.

“Nagpapasalamat ako kasi bilang FR na nagsisikap mag-hanapbuhay at mag-reintegrate sa community, syempre busy. Buti na lang nagkaroon sila ng pagkakataong makapunta rito,” sabi ni alias Anj, dating kasapi ng NPA sa Front Guerilla 56, matapos mapabakunahan ang kanyang pusa.

Bukod sa libreng bakuna, nagsagawa rin ang mga beterinaryo at kawani ng PVO ng seminar tungkol sa rabies prevention at responsableng pag-aalaga ng hayop.

Kaakibat ng pagdiriwang ng International Cat Day noong Biyernes at ng nalalapit na International Dog Day sa Agosto 26, layunin ng caravan na suportahan ang reintegrasyon ng mga FR, maghatid ng serbisyo sa komunidad, at magpalaganap ng kaalaman tungkol sa rabies.